شئ مخجل في مطار حلب

[Dr Philip Hardo]

شئ مخجل جدا

بأختصار:
بتاريخ 7 كانون الثاني وفي الساعة 2 صباحا كانت زوجتي مع الأولاد في مطار حلب بطريقها الى لندن عن طريق استنبول. وعند الخروج قابلت موظف جوازات في الأربعينات من عمره رفض وبكل جرأة ان يمشي أمورهم بدون أكرامية!!! وطلب من زوجتي علانية قال: شو عندك سوري او دولار او جنيه او يورو يمشي. احرجت زوجتي كثيرا وحاولت التملص منه ولكن بدون جدوى. وأخيرا سلمته على مضض 1000 ليرة سوري. يعني كم هو دخل هذا الموظف اليومي؟

كنت اتصور أن مثل هذا التصرف المسئ للسياحة قد أختفى من سورية الحبيبة ولازم حقا يختفي. وأنا في زيارتي القادمة الى حلب سأقدم شكوى خطية لرئيس مطار حلب وذلك كما علمنا الرئيس الراحل حافظ الأسد أن لا نسكت عن الخطأ....

وشكرا

[الحب كلو]

والله يا دكتور لازم وضروري إنك تشتكي لأنو متل هيك موظف إذا كلنا رح نسكتلو فشيئ أكيد انو رح يزيد التسعيره من شهر إلى أخر وباعتقادي لو اشتكيت اشتكي للرقابه الداخليه بالمطار وللمدير أيضا وإذا أمكنك الأمر أن تشتكي لوزير السياحه ما تقصر فيه لأنو هذا وأمثاله عم يعطو فكره سيئه جدا عن البلد والشعب السوري بأكمله, والسيد وزير السياحه مخصص يوم لمقابلة المواطنين أيّا كانت مشكلتهم

[Dr Philip Hardo]

في الحقية انا كتبت ايضا لوزارة المغتربين واقترحت ما يلي:

1. وضع كاميرات في المطار لردع مثل هذا التصرف.

2. Badge: ان يلبس عمال المطار شعار عمل وأسم واضح للعامل لتقديم الثناء أوالشكوى

3. تشجيع سفارتنا في الأغتراب المغتربين للكتابة لهم عن رحلاتهم الى الوطن من أجل توطيد اترابط وتحسين الخدمات.

وشكرا

[ramosh]

والله فعلا شي مخجل يا دكتور فيليب

و للاسف هاد شي منو كتير

بس بنفس الوقت فعلا ما لازم نسكت ... اذا كل واحد منا اشتكى يمكن نقدر نغير شي


مشكور دكتور فيليب

محبتي

[MicHeaL]

بسيطة دكتور فيليب هاد مابيطلع شي قدام غيرو اذا قبل بهالمبلغ منيح
صار الواحد اذا بدو يساوي معامله صغيرة بتكلفو اكتر من هيك
ااذا بدك تقدم شكوى بجوز معلمو يصير بدو منك كمان ههههههههه ويجوز يدافع عنو ويقلك يكتر خيرو ما طلب اكتر من هيك

[قمر]

يا دكتور فيلب لفت الوضوع نظري
بتعرف لما ملاك الابيض اجت لا عندي شو اتعذابت في مطار دمشق
ال شو ميزان الوحد طلع 23 ميزان التاني طلع 25 وميزان التالت طلع 33 كيلو وال شو بدهم يدفوعوهاا 200 دولاار عل التقل يالي معها زيادة مع انو التقيل معها عادي

شي تاني شركو امبياسا الاايرانية دغري من كراكس لا دمشق عما يعذبو الناس فيها وبفتشو الحقايب وكانو فيها ممنوعاات يعني بدي انزل فيا الله يحميني انو ما يعزبوني
قول امين
اما عن الرشوة مو رشوة شحادة وهنن نزلين من المغتربين الشعب السوري بفكر انو الشعب المغترب جالس عل بيض من دهب
هي هية المشكلة كلهااا
طول بالك شوي وخدها عل قلب البارد

وشي منو كتيرر
محبتي

[غادة عيدو]

سأروي لكم ما حدث معي في مطار دمشق عام 2005 حيث كنت عائدة إلى كندا ومعي طفلين بعمر 4 سنوات وسنتين .
أولاً أحب أن أنوه بأنني لا أحب ذكر أي شيء يسيء إلى سمعة سورية الحبيبة ,ولكن هناك بعض التصرفات من بعض الأشخاص تسيء إلى اسم سورية التي هي أكبر من هؤلاء ,ولكن علينا ألا نسكت عن الخطأ كما قال د.فيليب ,لأننا بذلك نعطي مجالاً للمرض بأن يستفحل بالجسم .
ما حدث معي أنني وصلت دمشق من حلب وودعني أخي الذي رافقني إلى هناك وبعد أن دخلت طلبت منه أن يذهب ,وعندما دخلت لأخذ البوردينغ باس قال لي الموظف الأولاد لا يستطيعوا الصعود إلى الطائرة لأنه صار لك 3 شهور و3 أيام في سورية , والقانون يقول إن زادت المدة عن 3 أشهر يجب أن تكون معك موافقة من الأب .
وفعلاً كان معي موافقة من زوجي عملناها عند محامي ومختومة بختم رسمي , فأريته إياها وللأسف موظف في مطار دولي لا يعرف أن يقرأ اللغة الانكليزية !!!!!!!!!!!.
أخذني إلى مكتب الأمن وشرحت للضابط مشكلتي وللمفاجأة الكبرى .........لا يعرف انكليزي !!!!!.
سألني ماذا مكتوب في الورقة ........قلت له ما بها وأريته توقيع زوجي وختم المحامي ,تصوروا ماذا طلب مني !!!!!!!!!!!
قال لي أريدها بالعربي!!!!!!!!
من أين آتي بها بالعربي وزوجي في كندا وبقي على إقلاع الطائرة نصف ساعة .
حدثت زوجي بالهاتف وطلبت منه إرسال موافقته بالعربي فاكساً للمطار,وكان الوقت عنده الواحدة والنصف صباحاً ,من أين سيؤمن فاكس في ذلك الوقت .
واسمي يذاع في الميكرفون غادة عيدو إلى البوابة لأنها ستغلق استعداداً لإقلاع الطائرة , وطفلين يبكيان ..........وأنا أبكي .
المهم خطر لي سؤال فعدت إلى الضابط وسألته هل يستطيع أحداً من أهل زوجي أن يقوم بالمهمة فقال نعم يحق للعم ذلك , فعدت للإتصال بأخ زوجي بحلب وطلبت منه الموافقة ,وأرسلها ولحقت بطائرتي في الثواني الأخيرة.
حتى هذه اللحظة أشعر بالندم لأنني لم أعترض للسفارة أو للتلفزيون أو لأي جهة مسؤولة عما حدث معي,كي لا يتكرر مع غيري .
أتمنى من الجميع أن يرفعوا صوتهم عندما يتعرضوا لمثل هذه المشاكل كي يبقى اسم سورية نظيفاً من هؤلاء .
آسفة على الإطالة .
محبتي
غادة

[wardi]

مع الاسف ياغادة معك حق ياريت يكون في رقابة علئ هيك ناس
وكمان المشكلة مابيعرفوا يقروا الورقة المكتوبة
موضوع مهم لانه في زوار كتار يجوا علئ سوريا سياحة
انشالله تنحل المشكلة
شكرا د فيليب علئ طرح الموضوع

[Marie - Tartous]

مرحبا

معكم حق انه شيء مخجل ولكن اشكرو ربكم انو مرًت معكم ع الخفيف, بدنا ثقافة تهذيب ولياقة عامة
ان شاء الله ما بتنعاد لا معكم ولا مع غيركم

بكرا احلى - ماري

[Dr Philip Hardo]

في احدى زياراتي لسوريا طلب مني احد المفتشين في الطار: حبة اسبيرين فأعتذرت لكن قيل لي فيما بعد كان قصدو غير شي وأنا ما فهمت. طيب شو ذنبي أنا؟ لكن خبرة زوجتي كانت عينك عينك يا تعطي ويا ماتفوت!!!!!

[wfa?]

Dr Philip Hardo
ههههههههههههههههههههه
كل كوم يا اخوتي والعفو حمامات المطار الدولي في دمشق كوم
ساروي لكم قصه محزنه في تصوري ولكنها ليست فلم رعب لا تخافو
اذا الوحده نزلت لحالها للحمامات معناتا كتير قويه واخت رجال على كل باب تواليت ريه او يمكن سكينه والله شكلهن يخوف حمام مالو باب والارض يبقى على حظك على ايش تتدوس شي قرف فعلا توقف النساء ملاكات اللحمه هههههههه ينطرو البخشيش وتكون محظوظ جدا اذا طالعو محرمه من جيبن وعطوك والمحرمه ملعون انفاسا من كتر الوسخ يمكن مسحو انفن فيها كمان هههههههههههه
انا يا جماعه راي الافضل انو الوحده مننا تعملها بحالها ولا تنزل لهيك حمامات ههههههههههههههههههههههههه
هذا المثل يلي يقول اسم كبير على ضيعه خرابه
مطار دمشق لازم يكون المرايه يلي تعكس للسائح رقي البلد
ومن اول 5 دقائق ومن خلال المعامله السيئه عم يحط السائح تصورو
على البلد ورقي البلد حرام جد اكبر حرام
أخي الدكتور فليب ايش الواحد تيشتكي ليشتكي
الف شكر لطرحك تحياتي وفااااااا

[Dr Philip Hardo]

جائني هذا الرد من وزارة المغتربين:

السيد فيليب:

وصلتنا رسالتك ونأسف لما جرى مع زوجتك.

لكننا لا نستطيع تحويلها للجهات المعنية دون تحديد اسم موظف الجمارك الذي أساء التصرف ،

فالتعميم في مثل هذه الحالات لا ينفع...

شاكرين تواصلكم معنا

[قمر]

اكيد كلامو دكتور
صدقني راحو مغترابين من هون شي حوالي 200 شخص واكتر في المطار عملو تشليح لا العالم من الحقايب لا المصاري
طولو بالك معليش شي منو كتيرر

تحياتي لك

[رولا]

أنا صارلي فترة عم أتابع الموضوع يللي شغل بالظاهر كثيرين وانعمل منها قضية كبيرة وبصراحة كنت مترددة كثير اني أعطي رأي بس ما عدت أقدر لازم أحكي ..
يعني أنا بتصور مانها مشكلة كبيرة اذا عطينا اكرامية لأحد الموظفين مثلا أنا تعودت دائما اني حضّر فراطات لحتى أعطي كل يللي عم يساعدوني بحمل الشنط يعني بالله عليكم وين المشكلة اذا عطيت اكرامية لموظف بالمطار لحتى يحمل عني الشنط ويحطهم على السكانر ؟؟!! مو أحسن ما الواحد يكسر ظهره بحمل الشنط ؟؟ ولا اذا عطيت شي موظف 1000 لحتى يمشيلي اموري وما أتعذب وين المشكلة ؟؟ اي أنا بتمنى لو كان بكندا ولا اميركا في هيك شي لكان وفرنا على حالنا كثير عذاب وتخبيط بلا طعمة ..
وعلى فكرة معليش الواحد يحكي شو صار معه بس مالازم نعمم ونشوه صورة مطار بلدنا بهالأمور ..صدقوني أنا أكثر بلد بحس فيه بأداميتي هو سوريا ومافي مرة نزلت لسوريا الا وبلاقي أفضل معاملة من الموظفين بالمطار من أكبرهم لأصغرهم فيا جماعة بس يللي بطلبه منكم أنكم تخفوا شوي على مطارنا لأنه ما بيستاهل هالشي على الأقل لسى فيه عندهم احترام للنساء والأطفال ..أنا مرّة كنت بمطار فيينا وبنتي كانت طفلة صغيرة وما كان لسى معي جنسية كندية ذلوني ذل ما بنساه طول حياتي كان عندي وقت طويل حوالي 9 ساعات انتظار فطلبت منهم بس انه يسمحولي اطلع على الطابق الثاني من المطار لأنه مريح أكثر ما كانوا يرضوا واضطريت اني اقعد 9 ساعات على الأرض من دون ماحدا يسأل علينا فبالله عليكم لو كان هاد الشي صار بمطار حلب كانوا تركوني اتبهدل هيك ؟؟
بتمنى أنه ماحدن يزعل مني لأنه بتضل هي وجهة نظري عن الموضوع ومع احترامي لكل الأراء الثانية ..

[a3az elnas]

مساء الخير احبائي اسمحو لي ان اعمل مداخلة صغيرة حول ما كتب من اراء و المشاكل التي يعاني منها المغترب عند نزوله للبلد
اؤيدكم جميعا فيم ا قيل من اراء وقصص حدثت مع البعض
الا انني اعترض مع الاخت رولا قولا وفعلا مع احترامي لرأيها
لان ما ذكر من قبل الاعضاء وامثالهم كثر
بانها حقيقة والانتقاد لتصرف البعض لا يعني الإسائة
أحييك د فليب
مشكلتي كانت كبيرة انا ايضا في مطار حلب عندما نقلونا جميع الركاب ط بالباصات من حلب لدمشق بسبب الضباب وعدم استطاعة الطائرة الطيران من حلب لذلك قرر السفر عن طريق مطار دمشق وهناك كانت المصيبة ههههههههههههههههههههههههههه
لكن لا أريد سردها لانها تؤلمني بصدق وأكاد اختنق وأموت غيضا
عندما اتذكرها ,, لاعليكم

لذلك اصبحت اشعر بألم وعدم رغبة لزيارة بلدنا الحبيب رغم محبتنا الكبيرة له
من تصرفات البعض وبدون محاسبة او قانون .
شكرا د, فيليب لاثارة موضوع حساس يمسنا جميعا كمغتربين ....يحنون لزيارة بلدهم في كل لحظة
تقبلو مروري
اعز الناس