مع بروز مشكله العنوسه ، وجنان البنات ع الولاد في مصر ، كان ليا كلمه في المشكله دي
ف الشرق عندنا العنوسه مشكله وده لسبيبين ؟
دماغ البنت و كلام الناس
أولاد دماغ البنت
متبرمجه انها تكبر وتدرس وتخلص دراسه وتقعد في البيت تستني العدل ، ويا حبه عيني لو اشتغلت تقعد بردوا تشتغل وهي مستينه العدل
وكأن خلاص الجواز نقطه حياه أو موت في حياتها ،
لو اتجوزت حياتها هتكون كويسه وهتجيب عيال وتعيش في تبات ونبات
ولو متجوزتش ( بعد الشر بعد الشر بعد الشر ) هتنتهي و تبقي خلاص الحياه خلصت والقيامه قامت وهعنس و هموت
مع ان البنت اللي بتتجوز دي اصلا بتخش في دوامه الجواز والعيال و التربيه والنيله والواد تعبان والبنت تعبانه وعاوزين فلوس والدروس والمذكره و الامتحان قرب .... الخ
والبنت اللي مش بتتجوز دي بترتاح من ده كله وبتحقق نفسها اكتر في شغلها لو شغاله او خدمتها او اي حاجه تانيه بتعملها
وكأن حواء خلقت فقط لكي تكون لأدم مع ان الله نفسه خلقها لكي تكون معين نظير
يعني مساعد مساوي لأدم
كله بحسب مواهبه وإمكانياته يعمر الارض ، ويحاول ينفع اخواته البني ادمين اي كانوا ذكور أو إناث
لو لحظنا دلوقتي هنلاقي إن أغلب المتفوقيين دراسيا بيكونوا بنات وده لأن الواد مكبر دماغه و مقضيها لعب
لكن لحد الكليه بس
لما تخلص البنت دراسه بتركز في الجواز وده يخلي الوالد متفوق عليها في مجال العمل
ومن هنا فاحتمال نجاح البنت وتفوقها في مجال العمل هيكون متزايد لو ركزت في شغلها اكتر من روتين الجواز
و سواء البنت اتجوزت ولا متجوزتش المفروض تسأل نفسها سؤال
انا موجوده ليه ؟
عشان بس ازود عدد سكان كوكب الإرض ؟! ولا لي هدف تاني
هو عموما عدد سكان الإرض مش ناقص زياده !
ثانيا : كلام الناس
و اجارك الله من الناس و كلامهم
مش سايبين حد في حاله
البت كبرت ، هي متجوزتش ليه لحد دلوقتي !
و لو اتجوزت هي مخلفتش ليه لحد دلوقتي !
ولو خلفت بنتين هي ايه كل خلفتها بنات ؟
ولو جوزها مات ... البنت دي فقر !
و لو كبرت في السن.... امال ايه هي مش ناويه تموت ؟
دول قاعدين للسقطه واللقطه مين جاب ومين حط وجاب ليه ومحطش ليه وكان المفروض يعمل كذا احسن من كذا
والسؤال هنا ؟
البنت ... محتاجه شبع عاطفي ... تملاه منين غير جوزها ؟ او خطيبها ؟؟
البنت محتاجه شبع عاطفي اوكيه مفهاش اعتراض .
تملاه منين دي ليها اكتر من طريقه مش لازم بس جوزها !
في ربنا .... اللي يجرب يقرب منه ويستمتع بيه هيشبع ... فالرب راعي فلا يعوزني شــئ
وفي مودة الناس و العمل الإجتماعي ....
يعني في حاجات كتير .....
طبعا زمانكوا بتقولوا دي معقده ولا ايه
بس انا عموما مش ضد الجواز ولا معاه
انا متجوزة و بتكلم من خلال خبرتى الصغيرة
بس الإنسان اتخلق مش عشان يتجوز وخلاص !
ومش الهدف الإسمي من خلقه الإنسان هو انه يزود عدد سكان الإرض
