أحلــــــــى يـــــــــــوم

[نغم]

لما كنت طفل صُغيَّر .. كان يوم عيد ميلادي بالنسبة لي هوه "أحلى يوم" في السنة ! .. حفلة كبيرة وهدايا ! .. كل ده ليه ! .. لأني شرَّفت العالم بإني اتوَلَدت ! ..

كبرت شوية .. ودَخَلت المدرسة .. وتَخَيَّلت إن "أحلى يوم" في حياتي .. هايكون يوم ما اتفَوَّق في دراستي .. ويختاروني "الطالب المثالي" ! .. وفعلا ً حَصَل ! .. وفِرحت جداً طبعاً ! .. لكن بعد شوية حَسِّيت إن مش هوه ده اللي أنا بادَوَّر عليه ! ...

انتهت دراستي .. وقلت لنفسي : يِمكِن "أحلى يوم" في حياتي .. هايكون يوم ما اشتغل وأكون شخص مستقل ! .. ولا حَد يقوللي : هاحرِمَك من المصروف !.. ولا حَد يقوللي : رايح فين وجاى منين وفعلا ًحَصَل ! .. واشتَغَلت .. لكن في الشُغل شُفت العَجَب ! .. ويا بَخت مَن كان المدير خاله ! .. كله بيقول : ياللا مصلحتي ! .. وشُفت أشخاص معندهاش مانع عشان تِطلَع دَرَجَة .. تِطلعها على جُثِّة اللي حواليه ! ...
بعدها قلت لنفسي : الحياة من غير الحب .. عاملة زي الصحرا ! .. غالباً "أحلى يوم" في حياتي .. هايكون يوم ما أحِب وأتجوز البنت الى بحبها ! .. أكيد وقتها هامسك نجوم السما بإيدَيّا ! .. وفعلاً حَصَل ! .. حَبِّيت وإتجَوِّزت .. لكن يا خسارة يا حُب ! .. ماكَنش العَشَم ! .. مالقيتش فيك اللي بادوَّر عليه ! ...


قلت لنفسي : الاولاد ! .. أكيد "أحلى يوم" في حياتي .. هايكون يوم ما ربنا يرزقني بطفل ! .. أكيد هوه اللي هايعَوَّضني عن أي خسارة ! .. وفعلاً حَصَل ! .. ورَزَقني ربنا بوَلَد يفرِح .. مَفرَحش إزاي ! .. يا خبر ! .. ده هوه الغالي ! .. تِعِبت ورَبِّيت وكَبَّرت .. وفي الآخر .. معلش يا بابا ! .. أصل ظروف الحياة شاغلاني وبَعدَاني عنك ! ...


قعَدت مع نفسي .. واسترجَعت كل الأحداث اللي مَرِّيت بيها في حياتي .. واستغربت جداً .. لأن مافيهاش حاجة أنا أتمنِّيتها .. ما حَصَلتش عليها ! .. ومع كده .. لا مال ولا جمال شبَّعنِي ! .. ولا حَسَب ولا نَسَب رَوَاني ! ..

في قَرَارِة نَفسي شاعر إني حزين ومش مرتاح ! .. شوية ظروف حلوة .. بترفعني فوق فوق ! .. وشوية ظروف صعبة .. بتنَزِّلني تحت تحت ! .. أنا فعلاً تَعبان !!! ...

-فجأة ! سِمِعت صوت هَمس في ودني بيقول : " تكثُر أوجاعهم الذين أسرعوا وراء اله آخر" مزمور 16: 4.
"لأن شعبي عَمِلَ شَرَّين: تركوني أنا ينبوع المياه الحَيَّة، ليَنقروا لأنفسهم آباراً، آباراً مُشقَّقَة لا تَضبُط ماء "إرميا13:2"

- خُفت ! .. " لأن كلامه كان بسُلطان " لوقا 4: 32 .. وقلت له : إنتَ مين ؟!؟! ...

- " فقال لي : أنا يسوع الذي أنتَ (تَستَهين بوجوده في حياتك) " أعمال الرسل 9: 5..
- سألته بمنتهي السذَاجة : هوه إنت يسوع بتاع يوم "الحَد" الصُبح ؟! .. يسوع اللي في الكنيسة !!! ...

- صِعِبت عليه ! .. وبحَنان ماشفتوش قبل كده قاللي:
وهوه فيه حاجة تَعباك ومِمَرَّرة حياتك غير إن إنت فاكر إن أنا يسوع بتاع يوم الحَد الصُبح بَس !!! ..

لأ يا حبيبي .. أنا يسوع بتاع الاتنين والتلات وكل يوم ! .. أنا يسوع بتاع العُمر كله ! ...

- ارتَحت له ! .. وقررت أفَضفَض له ع اللي في قلبي .. قلت له : أنا تَعبان ! .. كل ما أتمني حاجة .. بافضَل وَرَاها لغاية ما أحصُل عليها .. ولما باطولها .. باشعر إني مِسِكت الهوا بإيديَّا ! .. مش لاقي حاجة تِشبَّعني ! .. مش لاقي حاجة ترويني ! .. " كل الأنهار تَجرِي إلى البحر ، والبحر ليسَ بِمَلآن " جامعة7:1 ..
- " فقال يسوع : أنا هو خُبز الحياة . مَن يُقبل إليَّ فلا يجوع ، ومَن يُؤمن بي فلا يعطش أبداً " يوحنا 6: 35..

عشان كده ما تِستَغرَبش إنك جَعان وعطشان ! ...

إنت سيبتِني وجِريت ورا آبار ناشفة ! .. كنت مُتَخَيِّل إن هيه اللي هاتِسعِدَك ! ..

يوم ما ابتديت تِشتَغل .. ما أخَدتِنيش معاك وإنت رايح الشُغل ! ..

يوم ما فكَّرت ترتَبط .. ما أخَدتِش رأيي وإنت بتِختار شريك حياتك ! ..

يوم ما رزقتك بطفل .. ما سألتِنيش تِرَّبي ابنك إزاي ! ..

مشكلتك كانت دايماً إنك فاكر إن أنا يسوع اللي في الكنيسة بَس ! ..

صَدَّق إني كِتيـر حَبِّيتك .. صَدَّق إني عشانك جيت

صَدَّق إني أنـا مِستَنِّي .. مهما بِعِدت ومهما جريت

صَدَّق إني راح أنسَى ماضيك

صَدَّق إني راح أسـكن فيـك

ليـه الهَـم يسُودَك .. ليـه بيحنِي عُـودَك

خَلليني أمسِك إيدَك .. ويبقي اليوم يوم عِيدَك

- لما الناس بيسألوني : إيه السِر ورا التغيير ده كله !؟!؟ ..

- اقول لهم : كلمة السر هيَّه : ( يسوع إتوَلَد ! ) ..

- بيقولولي : وإيه الجديد في كده ! .. إنت جِبت إيه مِن عندك !؟! .. ما كلِّنا عارفين إن (يسوع إتوَلَد) !!! ...

- باقول : فعلا ً .. لو الأمر انتهى عند (يسوع إتولد) وبَس .. كنت هافضَل أنا زي ما أنا ! .. لكن كلمة السر هيَّه : (يسوع إتوَلَد جُوَّايا !) ...
وقِفت قدَّام عينيَّ المقفولة ! .. وقلت لها : إفتح يا عينى ! .. قالت لي : إيه كلمة السر ؟ ..

قلت لها : (يسوع إتوَلَد جُوَّايا !) .. فانفَتَحِت في الحال ! .. وقالت لي : ياه ! .. أخيراً هاتِبتِدِي تشوف إيدُه اللي ورا "كل" نجاح في حياتك ! ..

ووقِفت قدَّام وِدانِي المَسدُودة ! .. وقلت لها : إفتح يا وداني ! .. قالت لي : إيه كلمة السر ؟ .. قلت لها : (يسوع إتوَلَد جُوَّايا !) .. فانفَتَحِت في الحال ! .. وقالت لي : ياه ! .. أخيراً هاتِبتِدي تِسمَع صوته وهوه مِتعَلَّق ع الصليب .. وبيقول لك : (بَــحِــبَّــك)! ...

ووقِفت قدَّام قلبي المِتحَجَّر .. وقلت له : افتح يا قلبى.. قاللي : إيه كلمة السر ؟ .. قلت له : (يسوع إتوَلَد جُوَّايا !) .. فانفَتَح في الحال ! .. وقال لي : ياه ! .. أخيراً هاتِبتِدي تُشعُر بحِنِّيته ! .. أخيراً هاتِبتِدي تِحِس بتعزيَّاته و طَبطَبتُه عليك وإنت بتتألِم !!! ... بَس قلبي بالذات لما إنفَتَح قدَّامي .. شُفت فيه اللي لا يسُر عدو ولا حبيب !!! .. فقلت لـ"قلبي" : يادي المصيبة !!! .. هاعمِل فيك إيه !؟! .. ده إنت هاتوَدِّيني على جُهَنَّم حَدف !!! ...

رَد قلبي عليَّ و قاللي : اطَّمِّن ! .. " في ابتِدَاء تَضَرُّعاتك خَرَج الأمر
( مِن عند الرب ) ، وأنا جِئتُ لأخبِرَك لأنك أنت مَحبُوب " دانيال23:9 .. و هاتِبقَى مِن طينة غير الطينة ! .. " الكُل قد صَار جَديداً "كو 2 17:5
زمان كنت فاكر إن المعجزة هيه إن ظروفي تِتغَيَّر ..
لكن "دلوقتي" اكتشفت إن معجزة المعجزات هيه إن أنا اللي أتغير! .. إن أنا "أتولِد" من جديد ..










تحياتي للجميع

[قمر]

نغم
كلماتك اجت علي متل السيف
وخلتني ارجع افكر في ربنا يسوع كتير في وقت انا محتاجة الية اكتر من اي يوم مضي علي
ايمانا في سيدنا يسوع ما لازم نتنازل عنو في اي شي منمر فية وخصوصي في اوقات الصعبة الااليمة والحزينة هون لازم نتسمك فيةاكتر من اي يوم لاانو في هل اليوم هو يالي بدو يحطتنا في تجربة ويمتحن ايماناا فية
شكرا نغم عل المووضع ربنا يسوع هو يالي يحن علينا ويعطنا الصبر عل المرض
والمحبة في الفرح
ولا اعتراض لا حكمتو في اي شي نمر فية شكرا نغم والله يحميكي ويرح قلبك وتبقي مع ربنا يسوع دايمن
ونبقي دايمن مع يسوع
محبتي

[غادة عيدو]

عزيزتي نغم موضوعك جميل وحساس جداً .................لي عودة .
فقط أحببت أن أصحح للعزيزة قمر اسم كاتب المقال ,ربنا يريح بالك يا قمر , والعزيزة نغم هي كاتبة المقال .
محبتي
غادة

[قمر]

عزيزتي غادة معليش عيوني صدقني ما عما اشوف في عيوني هل الاسبوعين من كل يالي مر علي
ومن زعلي عل امي صدقني حالتي كتير تعبانة وموضوع نغم الجميل وكلامها لا الاامل والمستقبل وبدنا وبدنا نكون احسن شي في الدنيا عند مرض غيرنا وهمومهم ومنشوف مشكالناا ما منقول غير نشكر ك يا يسوع نشكرك يا يسوع
نشكر الله عل كل شي ولا اعتراض لاحكمتو

معليش حبيبتي اكيد كلامي موجه لا الكاتب وبعين في اول كلمة كتبت نغم وبعدين عقلي م راح في كلمتهاا

مرة تانية شكرا نغم
وشكرا غادة عل النتنبهة عيوني

[a3az elnas]

عشان كده ما تِستَغرَبش إنك جَعان وعطشان ! ...

إنت سيبتِني وجِريت ورا آبار ناشفة ! .. كنت مُتَخَيِّل إن هيه اللي هاتِسعِدَك ! ..

يوم ما ابتديت تِشتَغل .. ما أخَدتِنيش معاك وإنت رايح الشُغل ! ..

يوم ما فكَّرت ترتَبط .. ما أخَدتِش رأيي وإنت بتِختار شريك حياتك ! ..

يوم ما رزقتك بطفل .. ما سألتِنيش تِرَّبي ابنك إزاي ! ..

مشكلتك كانت دايماً إنك فاكر إن أنا يسوع اللي في الكنيسة بَس ! ..

صَدَّق إني كِتيـر حَبِّيتك .. صَدَّق إني عشانك جيت

صَدَّق إني أنـا مِستَنِّي .. مهما بِعِدت ومهما جريت

صَدَّق إني راح أنسَى ماضيك

صَدَّق إني راح أسـكن فيـك

ليـه الهَـم يسُودَك .. ليـه بيحنِي عُـودَك

خَلليني أمسِك إيدَك .. ويبقي اليوم يوم عِيدَك

- لما الناس بيسألوني : إيه السِر ورا التغيير ده كله !؟!؟ ..

- اقول لهم : كلمة السر هيَّه : ( يسوع إتوَلَد ! ) ..

اختيار ديني موفق عزيزتي نغم الرب يبارك حياتك