شخصيات موجودة في كل عيلة

[غادة عيدو]

شخصيات موجودة في كل عيلة

في كل عيلة توجد مثل هذه الشخصيات التي
تضفي على الجلسات ألوان معينة
شوفوها :

الشخص الخفيف الدم اللي بيسلي القعدة
وعادة بيكون لسانه زفر شوي و مسموح له يحكي شو ما بدو
طول ما هو عم بيضحك بالبشر
و هو اللي خالد لما يخطب لميا بيحكيلها عنه
لو تشوفي ابن عمي زياد نهفة بموتك ضحك
و بيجي زياد عالقعدة نافخ ريشه لانه عرفان شو بينحكى وراه
و شو ما حكي زياد الكل بيضحك
حتى لو قال صباح الخير

نمامة العيلة
وهاي عادة بتكون زوجة احد الاعمام او اولاد الاعمام
ما بعرف ليش ما تسالوني
هاي اللي عندها الاخبار دايما
و اخبارها لازم تشيل نصها و تصدق نص اللي شلته مشان توصل للحقيقة
بتبهر و بتفلفل على كيفها و بتضيف من عندها
بيحبوها النسوان و بيكرهوها و بنفس الوقت بخافوا منها
بتحس هيي بأهميتها لما حدا يسألها شو الاخبار

و بتفرد حالها و بتبلش تذيع و بالاخر بتقولك بالله ما تجيبي سيرة اني قلت لك انا شو دخلني ,بتعرفيني :بمشي الحيط الحيط و بقول يا رب السترة

غني العيلة
كل عيلة فيها واحد بيكون اغنى من الكل
و بكل عيلة بتكون مرته مركز نظر النساوين شو لبست ووين راحت و شو عملت
و بتكون نمامة العيلة متل الدنب الها مشان تجيبلهم الخبر اليقين
بتحكي من طرف مناخيرها
و بتقعد عطرف الكرسي كانها قرفانة
و اذا بتضيفها شي يا بترفضه يا بتاخده بس ما بتاكله ع اساس انها شبعانة ببيتها
كلامها و احاديثها لا تتعدى شو عملت الفلبينية
و كيف تقاتلت مع السيرلنكية
و اديش الشوفير منشف دمها
يعني كمان شوي بتحزن عليها

كبير العيلة
وهذا اللي بدك تسد بوزك و تسمعه و هو بيعيد القصة مرة ورا مرة ورا مرة ورا مرة

بيحكيلك قصص ايام الحصيدة و الثلجة الكبيرة
و لما كان بالجيش
نص قصصة كذب بكذب او مبالغ فيها
كان رح يشتري نص البلد
وفندق ومطعم إنعرض علية بالف ليرة
لما كان كيلو اللحمة بعشرين قرش
وااااااااااااااوو وخليها لربك

دكتور العيلة
وهذا المسكين اللي ما بيتهنى بقعدة
بس يوصل لمحل بيلتموا عليه و يا امي خواصري عم يوجعوني
و اللي بتنادي ابنها تعال ورجي الدكتور حلقك
هاتي معلقة يا غدير خليه يشوف زلاعيم اخوكي
و اللي بيعرض عليه روشتات دكاترة تانية
و اللي بيجيب له صور اشعة
و االلي بقولوا شوفلي ضغطي (طبعا كل القاعدين بفحصوا ضغطهم بعده)
و كل حياته بتكون هيك بغض النظر ان كانت زيارة او عرس او حفلة
طبعا هو ما بيقصر
و ممكن يصير يقولك مين الحمار الي اعطاك هذا الدوا ارميه و بيكتبلك غيره

متغرب العيلة
كل عيلة فيها على الاقل واحد بالخليج
بيجي بالصيف و الكل بيكون يستنى الهدايا
لما يوصل بيلاقي الكل متجمع و الكل بيسلم عليه
و بتكون امه عامليتله ورق عنب و كوسا
و شباب العيلة بينلموا و اشتقنالك يا ابو الزوز
و شوفلنا شغل معاك و الله اخوك ما لاقي ياكل
كانه المسكين صاحب شركة هنيك

طبعا الخرط بيشتغل من طرفه
و بيحكيلك عن سيارته البورش و بيته الفيلا و بيكون عايش مع تلاته بغرفة
بعد يومين بتلاقيه قاعد عالبلكونة بالشيال
لحاله بيشرب شاي
ولا حدا سائل فيه
و امه بالمطبخ عم تعمل مجدرة

عزابي العيلة
او الدون جوان النسونجي
بيكون حليوة نسبيا طبعا
و بس يزور حدا من القرايب عندهم بنات بينضبوا
و بيصيروا يبصبصوا عليه من بعيد و بتشتغل المسجات
هدا بيكون عنده شوية غرور على شوية عجرفة
بيقعد و بيحط رجل على رجل و عادة بيصير عمره فوق الاربعين و ما بيتجوز
وبكل قعدة بيحكي عن غرامياته و بيتجمعوا حواليه شباب العيلة
و بيصير يفرجيهم صور و مسجات


شقفة العيلة احلى بنت بالعيلة
بتكون محط انظار اولاد العم و الخال بس هيه نظرها بعيد شوي
بتمشي يا ارض اشتدي ما عليكي قدي
و بتقعد مع نساوين العيلة حتى يصيروا يمدحوا جمالها
كمان متل دون جوان العيلة ما بعجبها العجب و بتطوّل لتتجوز
اذا تجوزت اصلا
ما بتكون صحبة مع بنات العيلة و بتلاقيها دايما في الاعراس بتتلقط عريس من بعيد
من مبدأ نفسي فيه و تفو عليه

كمبيوترجي العيلة
هذا طبعا بعد طفرة الكمبيوتر صار له اهمية كبيرة
بالاول كان الفاشل التافه اللي ما بيعرف شي
وضعه متل دكتور العيلة
و بتقول امه بكل خيلاء
بس يجي علاء بيزبطلك الكومبيوتر
و الله ما في اشطر منه
مبارح خلانا نشوف عمرو دياب
و بيجي علاء المسكين
شوف كمبيوتر ابن خالتك اللعبة ما عم تشتغل
و بيجي حمودة و بيقعد يتفرج على علاء
مثله الاعلى بالحياة و هو بيشغّل الكومبيوتر
و ينبهر حموده
و بيفهمه علاء انه مشان تقدر تلعب اللعبة لازم بالاول تشغّل الكومبيوتر


طفل العيلة الموهوب
هذا اللي بكل لمة بنادوه يغني
تعال عبود غني لعمو اغنية اليسا لو تشوفو كيف بغنيها
و طبعا في نوعين من عبود في عبود اللي مابيستحي
و بتلاقي قرفك و هو بيعيد الاغنية
و امه فرحانه فية و كل شوي بتقول ما شاء الله
كأنه ما حدا خلّف غيرها
او النوع اللي بتطلع روحك و امه بتقنعه يغني
و ياللا فرجي عمو اديش انت شاطر
و بتصير انت بدك تخلص
بتقوله غني حبيبي بعطيك شوكولاتة
و بيكون بجيبتك شوكولاتة مفعسة من عرس قديم
بتفرجيه اياها كنوع من الاغراء
و في حالة كان دكتور العيله قاعد بيجي التهديد المباشر
اذا ما بتغني الدكتور بيضربك ابرة
منقووووووووووووووووووووووووووووووووووول

وهلأ خبرنا في عندك هالشخصيات بعيلتك ؟؟؟؟؟؟؟؟؟؟؟؟؟؟؟؟
شوف أنا شايفتك وأنت عم تقرأ كل شخصية شلون عم ترسم مباشرة واحد من العيلة متل ما صار معي ههههههه

[gress]

والله يا اخت غادة كل كلمة مكتوبة صح مية بالمية وانا مع هالحكي كل عيلة لا تخلو من هالشخصيات الرائعة ههههههههه
مشكورة اخت غادة

[a3az elnas]

حكما كل عائلة تحتوي على هذه النموذجات من الشخصيات
شكرا غادة

[ashor]

+++

طفل العيلة الموهوب
هذا اللي بكل لمة بنادوه يغني
تعال عبود غني لعمو اغنية اليسا لو تشوفو كيف بغنيها
و طبعا في نوعين من عبود في عبود اللي مابيستحي
و بتلاقي قرفك و هو بيعيد الاغنية
و امه فرحانه فية و كل شوي بتقول ما شاء الله
كأنه ما حدا خلّف غيرها

ما عرفنا مين هو هاد عبود ؟؟؟؟؟؟ ههههههههه
يمكن باللغة الكندية عبود بتعني يا ابني ؟؟؟؟؟؟؟؟؟

المهم موضوع جميل جداً وواقعي ...

متغرب العيلة
كل عيلة فيها على الاقل واحد بالخليج
بيجي بالصيف و الكل بيكون يستنى الهدايا
لما يوصل بيلاقي الكل متجمع و الكل بيسلم عليه
و بتكون امه عامليتله ورق عنب و كوسا

يلا عبود ايمتا بدك تيجي اشتقنالك
ما تنسى تجيب معك لابتوب لأخوك الصغير
وتجيب كمان معك جهاز خليوي من نوع آي فون الحديث لأختك
اكيد نسيت اخبرك ما تنسى تجيب معك قندرة وبلوزة حلوة مع ساعة يد حلوة لأبن الجيران
لأنو امو دائماً يتسأل عنك .
انا ما بدي شي ابداً المهم تجي انت وتجيب معك شو وفرت من دراهم يمكن ندفع قسط البيت الجديد اللي اشتريناه وقسط السيارة الجديدة اللي اشتريناها بس يا عبود شو حلوة السيارة .!!!
صحيح ما تنسى كمان تجيب معك بارفان من النوع العالي لأبن خالتك دائماً عم يسأل عنك
ووحدة كمان لبنت ابن عمك بارفان نسواني من النوع التقيل لأنو هي مخطوبة انت بتعرف ...
وصحيح يا عبود لو ظل معك فلوس ما تنسى تجيب معك مكروويف للبيت لأني انا ما عم اقدر اطبخ كل يوم عم نسخن الموجود دائماً . مع مكواية بتشتغل على الليزر .. وجهاز قياس الضغط الكترونية وجهاز قياس السكر .. عم نستناك ....



...

.......

[narod2008]

وهلأ خبرنا في عندك هالشخصيات بعيلتك ؟؟؟؟؟؟؟؟؟؟؟؟؟؟؟؟
شوف أنا شايفتك وأنت عم تقرأ كل شخصية شلون عم ترسم مباشرة واحد من العيلة متل ما صار معي ههههههه

يا غدوووووووووووش مو عيب ما يكون عنا هيك شخصيات
انتي عم تقوليها "موجودة بكل عيلة"
بقا الله يجيرنا من
النمامة الي بتودي وبتجيب الحكي وبتوقع العيل مع بعض
ومن الغني الي شايف حالو
ومن الكبير يلي بيصرعك بحكاياتو وبيعيدها 10 مرات
ومن ومن ومن............ما بيخلصوا يا غدووووووووووووش
كلامك صح 100%
محبتي
نارود

[قمر]

البيوووووووووووت اسرار
شو نعمل والله صح
صح صح
كل شي بهون ال تعلقي العيئل مع بعض اضرب شي
كلهم اضرب من بعض
بس موجودين
ما منقدر نعمل شي غير الصبر


مشكورة عيوني

[غادة عيدو]

أسعدني مروركم الجميل أعزائي غريس - اعز الناس - ملفونو اشور - نرود - قمر

كما قلتم إنها شخصيات من حياتنا وربما نكون نحن إحداها , إنه تنوع شخصيات الحياة الذي لا بد من وجود كل منها ........في كل عيلة .
أشكر إضافتك الجميلة ملفونو وأكيد قابلت كتير من أهل هالعبود هههههههههههههههههه
محبتي
غادة

[nahren]

ههههههههههههههههه شخصيات اخر الزمن
صدقيني شايفين هيك نماذج واكتر من هيك
واحلى شي لما يجي ضيف من هالشخصيات لعندك ويصير يطلب وين العصير تبعي
انا مو بني ادم لكن شو مفكريني هههههههههه
يعني طفل حقاني هههههههه


يسلمو غادة ومتأسفة لتأخري بالرد

[غادة عيدو]

بتنوري عزيزتي نهرين في أي وقت
محبتي
غادة